Polis naangol sa Ironman pasidunggan
CEBU, Philippines- Pasidunggan sa Police Regional Office (PRO)-7 ang usa ka polis nga nabanggaan sa usa ka siklista nga miapil sa Cobra Ironman 70.3 Philippines niadtong Domingo.
Matud ni PRO-7 Director, Chief Supt. Prudencio Tom Bañas, nga usa ka maayong ehemplo ang gihimo ni PO1 Mark Anthony Cabahug sa Lapu-Lapu City Police Office nga misakripisyo sa iyang kaugalingon aron dili mapasok sa railing kilid sa karsada ang maong rider.
Sumala pa ni Bañas nga base sa iyang nadawat nga kompletong report gikan sa hepe sa LCPO, iyang nahuna-hunaan nga angay lang hatagan og pasidungog ang maong polis nga nakaangkon og bali sa iyang abaga gumikan sa insidente.
Dugang ni Bañas nga nagkinahanglan og susamang batasan ni Cabahug ang kapolisan sa Rehiyon-7 nga andam og tagana sa iyang kaugalingon aron lang maluwas ang usa ka tawo.
Gibutyag usab ni Bañas nga andam ang PRO-7 moabaga sa gasto sa hospital ni Cabahug samtang ang organizer sa kalihukan mipadayag usab nga motabang sa maong polis.
Himoon ang pagpasidungog kang Cabahug kung makagawas na kini sa tambalanan. - /GMR) (BANAT NEWS)
- Latest
