Nangompra og tinai nabanggaan patay

CEBU, Philippines- Nagkatag sa karsada ang kinompra nga sulod sa ginhawa-an human ang nagbiseklita nga lalaki gidasmagan patay sa usa ka Mitsubishi Montero kagahapon sa buntag.

Ang insidente nahitabo sa may dalan S. Osmeña, North Reclamation Area, Mabolo, dakbayan sa Sugbo kinsa ang biktima nailhan nga si Jonas Inoc, lumad nga taga Getafi, Bohol.

Sa imbestigasyon sa traffic division sa Cebu City Police Office nasayran gikan sa merkado sa dakbayan sa Mandaue ang biktima nga nagpalit og sulod sa ginhawa-an nga ilang luto-on sa gitrabahoan nga kan-anan sa Pasil.

Subay sa ikaduhang lane sa dalan S. Osmeña ang biktima sakay sa biseklita ug matud pa kalit lang nitabok sa inner line diin kusog nagdagan nga sakyanan hinungdan nga nadumbolan ug nabunal sa karsada. Ang drayber sa Montero sports utility vehicle nga nakadasmag nailhan nga si Arnold Najera, 47, taga Dumlog, dakbayan sa Talisay.

Sumala pa ni PO3 Edgar Baton nga pag-abot nila sa lugar, nagtuo sila nga ang mga dugo ug nagkatag nga unod-unod sa karsada iya sa biktima apan ilang nasuta nga ang kinompra diay nga sulod sa ginhawa-an.

Dali pa unta nga miresponde ang Emergency Rescue Unit Foundation (ERUF) apan gumikan sa seryosong angol sa ulo ug nawong sa biktima, nakabsan gyud kini sa iyang kinabuhi.

Kasamtangang gikustodiya sa kapolisan ang drayber sa SUV samtang nagpaabot sa tagtungod sa biktima kun mopasaka ba og kaso o makig-settle na lang. - /GMR) (BANAT NEWS)