Fake CIDG agent gidakop

CEBU, Philippines- Nadakpan sa entrapment operation sa kapolisan ang usa ka tawo nga nagpatuo nga sakop sa Criminal Investigation and Detection Group (CIDG)-7 dihang usa ka computer technician gihulga nga dakpon kun dili mohatag og kuwarta.

Ang operasyon nahitabo alas 11 pasado sa buntag niadtong Domingo sa dalan H. Abellana, barangay Canduman, dakbayan sa Mandaue.

Ang nadakpan mao si Ferdinand Porne Ranile, 46-anyos, ulitawo nga taga dalan Llorente, barangay Capitol Site, dakbayan sa Sugbo.

Niadtong Hulyo 29 sa buntag, giingong nahidangat sa computer shop ni Nathaniel Ibata Salibongcogon sa Purok 5, Barangay Cubacub si Ranile ug nagpakita sa ID nga CIDG agent.

Si Ranile mipasangil nga nakadawat siya og report nga namaligya og shabu si Salibongcogon ug gihimo lang plantalya ang guba nga computer nga ihatud sa kustomer apan ang sulod shabu.

Gipatan-aw ni Salibongcogon si Ranile sa mga computers apan wala’y nakit-ang shabu hinungdan nga nilakaw ug namulong nga mohatag na lang og kwarta aron dili mahasol.

Niadtong Hulyo 30 ug Agosto 1, nagsige og text ang suspetsado ug naningil sa kwartang gipangayo apan wala panumbalinga sa biktima. Niadtong Agosto 2, nibalik ang suspetsado sa computer shop ug masuk-anong misukmat ngadto sa biktima sa wala pagtubag sa iyang mga text messages.

Nunot sa kasuko sa suspetsado, ang biktima mihangyo nga pagkasunod adlaw na mohatag og P1,000 ug mag-abot sila sa duol sa gasoline station sa dalan H. Abellana sa barangay Cubacub.

Matud ni SPO1 Tirso Plania nga buntag niadtong Domingo, midangop sa ilang buhatan ang biktima ug giplano dayon ang entrapment operation nga miresulta sa pagkasikop sa suspetsado. Nakuha nga ebidensiya gikan sa suspetsado ang ID isip asset sa CIDG-7 nga mi-expire na niadtong 2010 ug ang marked money nga P600 nga gihatag sa biktima.

Kasong robbery with extortion ang kaso nga gipasaka batok sa suspetsado kagahapon. - /GMR) (BANAT NEWS)