Mopalit unta’g tuba gitigbas

CEBU, Philippines - Kritikal ang kahimtang sa usa ka 73-anyos nga lalaki human kini gitigbas sa iyang silingan samtang nagpalit unta og tuba didto sa Sitio Bangag, Barangay Saavedra, Moalboal kaniadto’ng miaging gabii.

Base sa report sa kapolisan nga si Decederio Crabantes gitigbas ni Anito Carba, 62, atol sa ilang panaglalis human gibalibaran ang biktima nga mopalit unta’g tuba gikan ni Carba.

Matud ni PO1 Dennis Lamoso sa Moalboal Police Station nga dugay na nga nagkabangi ang duha mahitungod sa ilang pamilya mao nga ang suspetsado dili ganahan mobaligya og tuba ngadto ni Crabantes.

Tungod kay gusto g’yud siya makapalit og tuba mibalik si Crabantes apan napungot si Carba ug nagkalalis. Kalit lang mikuha’g sundang si Carba ug gitigbas si Crabantes sa iyang nawong ug kamot.

Dali nga gidala si Crabantes sa Badian District Hospital   apan gibalhin ra usab sa Vicente Memorial Medical Center gumikan sa grabe niya nga mga samad nga nagkinahanglan og dugang pag-atiman.

Si Carba gidakop sa kapolisan ug narekober ang usa ka sundang nga gituohang maoy gigamit pagtigbas sa biktima.

Gitanggong sa Moalboal Police Station detention cell ang suspetsado ug pasakaan og kaso karong sunod semana.  (BANAT NEWS)