Sobra 10 ka ilegal nga mananagat nasikop
CEBU, Philippines - Dili momenos napulo ka mga mananagat nga giingong ilegal nga nanagat sa kadagatan sa Toledo ang nasikop sa nagpatrolyang sakop sa Philippine Navy Cebu detachment kagahapong adlawa.
Giila ang mga dinakpan nga sila si Arman Tejas, Jessie Gregas, Glenn Tejas, Elesio Conteñita, Wilson Rago, Ernesto Conteñita, Rolando Paquero, Joseph Osmundo, Leonardo Deen, Jennis Lumangtad, Tony Zomo, Tomas Gabito Eigi, Ipon pulos hingkod ang panuigon nga mga residente sa barangay Sto. Niño ug Mainggit sa dakbayan sa Toledo.
Lakip usab sa gidakop si Felipe Lumangtad ang tag-iya sa barko nga gigamit sa pagpanagat.
Matud ni Ricardo Tornea sa Philippine Navy ug sa iyang kaubanan nga naabtan nila nga nanagat ang maong mga suspek nga nigamit og taktak ug pisi nga gibutangan og lukay og rendahon kini gamit ang pukot, gidili kini tungod kay hasta ang mga gagmay’ng isda maapil og kakuha.
Nakalapas usab ang maong mananagat sa balaod human wala kaabot sa gitakda nga fishing zone nga 10 kilometros gikan sa baybayon sila nanagat.
Gisakmit ang barkong panagatan sa grupo ug nakuha ang isda nga budloy, gutob ug bansikol nga niabot sa hamabaw sa banyera. Matud sa usa sa mga suspek nga dugay na kini nilang gihimo nga matang sa pagpanagat nga mao ra usab ang ilang panginabuhian.
Daling gidala ang maong mga dinakpan sa Toledo City Police Station kauban ang sakop sa Toledo City Bantay Dagat Task Force ug Philippine Navy. Una niini gimando ni Toledo City Mayor John Henry “Sonny” Osmeña sa Philippine Navy sa pagronda sa kadagatan sa Toledo human siya nakadawat og report nga adunay mga mananagat nga migamit og illegal fishing methods. (BANAT NEWS)
- Latest
