Impostor nga taga VECO sa karsel diretso

CEBU, Philippines - Gikatakdang pasakaan og kasong robbery-extortion karong Lunes ang duha ka tawo nga nagpatuo nga kolektor ug electrician sa Visayas Electric Company  (VECO) nga giingong nangilkil sa usa ka konsumidor .

Ang mireklamo mao ang 68- anyos  nga biyuda nga si Erlinda Napuli nga taga V & G  Subdivision sa Barangay Nangka Lungsod sa Consolacion.

Si SPO1 Renerio Patillas miila sa duha nga nadakpan nga mao sila si Perlito Olivar Sochesa, 37, taga Barangay Carreta ug Bryan  Togado Coca, 31, taga dalan Jones Avenue pulos sa dakbayan sa Sugbo.

Matud pa ni Patillas nga gibalikbalikan sa mga suspetsado ang biktima sa pag-adto sa ilang panimalay ug kanunay hulgaon nga putlon ang kuryente kun dili makabayad sa P10 mil nga konsumo sa kuryente sanglit kuyog man niini ang ilang electrician.

Nahibulong ang maong biktima sanglit matud pa niya nga wa man siya’y palta sa pagbayad sa bill sa iyang kuryente.

Dugang pa ni SPO1 Patillas nga mitaho na ang biktima sa miaging bulan sa ilang buhatan labot sa ilegal nga kalihokan sa duha ka mga lalaki ug ilang gitambagan sa pagpahibalo sa buhatan sa VECO ug sa ilang buhatan kun mobalik kini karong bulan sa Agosto.

Tuod  man, mibalik gyud ang duha niadtong Agosto 1 apan gabii silang nangabot ug nagdala na usab og billing sa VECO ug mihulga na usab nga putlan kini sa linya sa kuryente.

Ang biktima nga nanag-iya og panimalay nga paabangan sa maong lugar dali nga nakasugo sa iyang sakop sa pamilya sa pagtawag sa buhatan sa VECO ug kapolisan sa pagpahibalo nga namalik na usab ang duha nga nagpailang mga kawani sa VECO.

Si Patillas miingon nga gilingawlingaw lamang una sa pag-estorya sa biyuda ang duha ka mga suspetsado hangtod nga naabot ang mga polis kauban ang representante sa VECO ug giposasan ang duha ka impostor nga kawani sa VECO ug gibalhog sa bilanggoan.  (BANAT NEWS)