Ngalan sa killers gisuwat sa libro

CEBU, Philippines - Patay ang usa ka lalaki samtang kritikal ang iyang kauban human sila gibanhigan sa wala pa mailhing mga tawo pasado alas 10:00 kagahapon sa buntag sa Sitio Subida, Barangay Vito sa lungsod sa Balamban. Biktima nakasuwat pa sa mga pangalan sa mga tawong mibanhig kanila diha sa usa ka libro nga narekober sa kapolisan

Ang namatay nailhan lang sa ngalan nga “Jason” samtang ang naangol naila nga si Ritchel Fuentes, 43, nga kasamtangang nagpuyo sa J and J Farm sa Barangay Liki sa nahisgutang lungsod.

Sumala pa ni PO2 Donard Pitogo, desk officer, nga base sa imbestigasyon nga gihimo ni SPO1 Jose Ranelito Villarino nga ang mga biktima nagsakay og motor gikan sa farm padulong sa Balamban proper.

Apan kalit lang sila nga gibanhigan sa wala pa mailhing mga lalaki hinungdan nga natumba ang ilang motor. Ang mga residente nga nakadungog og buto sa armas dali nga misusi sa dapit ug ilang nakita nga naghigda sa dalan ang duha.

Daling gidala ang duha sa Balamban District Hospital apan si Jason gideklarar na nga dead on arrival.

Samtang tungod sa grabeng samad nga naangkon ni Fuentes gidala kini sa usa sa mga tambalanan sa dakbayan sa Sugbo.

Nakuha sa crime scene ang 12 ka kabhang sa kalibre .45 ug .9mm  diha sa crime scene lakip na sa tulo ka  wa kabuto nga bala sa .9mm ug ang puthaw nga gidudahan sa kapolisan nga piyesa sa armas.

Narekober ‘sab sa kapolisan ang usa ka fairytale nga libro nga gipanag-iya ni Fuentes nga gikatahong gisuwatan pa niini sa mga angga sa mga tawo nga nipusil kanila.

Apan gipugngan lang una sa kapolisan ang maong mga ngalan sanglit padayon pa ang ilang imbestigayon. Sumala pa ni Pitogo nga posibleng nagdumot gyud ang mga suspetsado kanila hinungdan nga gibanhigan ang duha.

Gituohang nagmotor ang mga kriminal tungod kay duha ka klaseng kabhang sa mga bala ang nakuha sa crime scene ug gituohan usab nga gitaparan ang motor sa duha dayong pusil kanila ug pagkahuman mipasirit palayo.

Matud pa nga sinaligan sa farm ang mga biktima ug gikatahong may binuhi kini nga mga hayopan nga maglibudsuroy sa kaumahan sa mga silingan ug pangan-on ang tanom. (BANAT NEWS)