Papua New Guinean nag-wild

CEBU, Philippines -  Gisikop sa kapolisan ang usa ka Papua New Guinean human nag-wild ug namatid gumikan sa ka hubog sa usa ka imnanan sa barangay Camputhaw, dakbayan sa Sugbo kagahapon sa kaadlawon.

Ang langyaw naila nga si Saah Josua, 24, nagtungha sa USP College of Engineering ug kasamtangang nagpuyo sa Ayala Condominium.

Matud ni SPO2 Edgar Priollaneta sa Fuente Police Station, nga nahinabi sa Banat News nga sila si Lynn Princess Miranda ug Mark Anthony Desierto ang nireklamo nga nakatilaw sila sa pagmaoy sa langyaw ug giguba ang wiper sa ilang sakyanan.

Unang miresponde ang duha ka mga barangay tanod sa maong lugar nga sila si Oliver Perez ug Joseph Belga human usa ka impormasyon ang nadawat labot sa maong langyaw.

Sumala pa nga dili pa gyud unta mouban paingon sa presinto sa kapolisan ang langyaw kinsa miaksyon pa og sukol.

Sa karsel na sa Fuente Police Station nahuwasan sa kahubog ang langyaw kinsa nabut-an ug nagmahay sa iyang gibuhat.

Nagpaabot ang kapolisan nga mopasaka og pormal nga kaso ang mga reklamante batok sa maong langyaw apan ang kapolisan sa ilang bahin mopasaka gyud og kaso sa kalapasan sa ordinansa batok sa paghubog-hubog. (/GMR)(BANAT NEWS)