P2M Shabu nasakmit, lima nasikop

CEBU, Philippines - Lain na ‘sab nga operasyon batok ilegal nga drugas ang gilusad sa City Intelligence Branch (CIB) ug City Anti-Illegal Drugs Special Operations Task Group (CAIDSOGT) sa Cebu City Police Office  ug kapin sa P2 milyones nga kantidad sa drugas ang nasakmit sa duha ka managlahing buy-bust operation nga miresulta ‘sab pagkasikop sa lima ka mga suspetsado.

Target unta sa CIB ang level 1 drug pusher sa R. Palma Street, Barangay San Roque nga si Ronald Miramontes, alyas “Onad” apan nakaikyas kini hinuon  nadakpan ang iyang batabata nga si Hernando Ponso, 34.

 Sumala pa nakalayat si Miramontes sa likod sa ilang balay apan dunay nakuha nga walo ka medium size nga paketeng shabu nga motimbang og kapin 200 gramos nga nagkantidad og dili mominos og P2  milyones. Nakuha usab sa CIB ang usa ka .25 caliber pistol,  duha ka bala niini, tulo ka magazine sa KG9 submachine gun; mga bala sa .45, .357 ug .9mm nga armas ug duha ka timbangan sa drugas.

Samtang nadakpan sa CAIDSOTG ang tulo ka lalaki ug usa ka babaye sa buy-bust operation sa Highway 77 sa Talamban nga giilang sila si Neil Montejo, 42, Edgar Abarca, 46, Mark Lochan, 29, ug Ana Mae Villaganas, 21. Apan ang target sa mga operatiba nga si Lester Bontuyan ang nakaikyas.

Nakuha sa kapulisan gikan sa mga dinakpan ang 13 ka gagmay nga pakete ug duha ka medium size paketeng shabu. Matud pa ni Senior Superintendent Romeo Santander nga gikan sa petsa 2 ning bulan sa Hulyo hangtod sa petsa 30, moabot na og P5 milyones  nga kantidad sa drugas ang ilang nasakmit. (BANAT NEWS)