Mga polis sa LCPO gipasidunggan

CEBU, Philippines - Gipasidunggan sa Police Regional Office-7 ang 12 ka polis sa dakbayan sa Lapu-Lapu human sa malampusong pagkasakmit sa P1.3 milyones nga kantidad sa shabu ug pagkasikop sa nagpayuhot niini.

Si PRO-7 Director, C/Supt. Prudencio Tom Bañas ang mihatag sa “Medalya ng Papuri” sa hepe sa City Anti-Illegal Drugs Special Operations Task Group nga si Police Senior Insp. Rogelio Pineda Jr. kinsa responsable sa pagkasikop ni Aprilyn Rolea niadtong Hunyo. Lakip sa gipasidunggan mao  sila si PO3 Joseph Villamor, PO3 Michael Echavez, PO3 Ranel Guinita, PO2 Joevelito Sismar, PO1 Sheryl Abanes, PO1 Julius Dona, PO1 Dionesio Casia, PO1 Dennis Espinosa ug  PO1 Joseph Aldrich Callera.

Gidasig ni Bañas nga padayunon sa kapolisan ang ilang agresibong kampanya batok ilegal nga drugas sulod sa ilang area of responsibility ug ang pag-prioritize sa crime prevention ug public safety.

Gipasidunggan usab ni Bañas ang hepe sa Lapu-Lapu City Police Office, Senior Supt. Armando Radoc kinsa iyang kauban sa pag-courtesy call sa buhatan ni Mayor Paz Radaza kagahapon.

Lakip sa gipasidunggan ni Bañas si  Supt. Virgil Ranes sa LCPO’s Task Force Kalikasan kauban nilang Police Officers Brandon Marana, Joseph Casinillo, Neil Solana, Saturnino Inoc, Jason Tiro and Junlie Bunado mahitungod sa nasakmit nga karne sa iho.

Ang mga frozen shark meat gikarga sa usa ka Mazda pick-up hinungdan nga  ang drayber nga si Federico Cañete Cabido ug truck helper nga si Adonis Vitor Dolores, taga Sawang, dakbayan sa Sugbo ang gipangdakop.

Ang polis nga si Brian Lou Guillen kinsa  nahimong kampiyon sa Southeast Asia’s longest 280K Triathlon event gikan sa lungsod sa Santander padulong sa Daanbantayan gipasidunggan usab ni Bañas. (BANAT NEWS)