Traffic advisory sa Ironman Triathlon

CEBU, Philippines - Ang City Traffic Management System (CTMS) sa dakbayan sa Lapu-Lapu mipahibalo nga adunay mga karsada sa dakbayan nga ilang sirad-an karong Agosto 2 atol sa pagpahigayon sa Iron Kids 2014 sa maong siyudad.

Si Frank Brazil nga maoy operation chief sa CTMS mihatag og traffic advisory nga sirad-an nila ang pipila ka karsada sugod alas sayes ug molungtad kini sa alas 10 ang takna sa buntag.

Matud ni Brazil nga lakip sa mga karsada nga dili kaagian og mga sakyanan mao ang Angasil Road Kabisang Tasyo nga molahos na ngadto sa Mangal, Punta Engaño.

Si Brazil miingon nga ang tanan nga mga dalan sa maong lugar nga maoy pagasubayon sa mga mosalmot sa maong paugnat sa kusog ang magpabilin nga pagatak-opan hangtod nga kini mahuman.

Dugang pa ni Brazil nga lakip sa pagatak-opan sa maong indigay mao ang main entrance sa New Town Center sa national highway hangtod ngadto sa eskena Angasil ug mga access road niini.

Gitataw ni Brazil nga susama gihapon ang kahimtang sa Agosto 3 nga mao na usab ang pagpasiugda sa Ironman Triathlon 2014 apan iyang giklaro nga ang pikas lane sa Marcelo Fernan Bridge ipabilin nga bukas alang sa pag-agi sa mga sakyanan tungod kay ang pikas lang agianan ang gamiton sa Triathlon.

Samtang bukas usab ang First Mactan-Mandaue Bridge sa pag-agi sa mga sakyanan ug dili maapektohan ang ilang pagbiyahe alang niadtong mopaingon sa Poblacion, dakbayan sa Lapu-Lapu, lungsod sa Cordova ug dakbayan sa Sugbo.

Gitambagan ni Brazil ang mga motorista, hotel guests ug mga molupyo sa dakbayan  nga adunay mga lakaw sa maong adlaw nga mosayo lang sa paggikan aron sa paglikay nga masinati ang ilang kalangan sa pagbiyahe. (BANAT NEWS)