Motorsiklo gibag-iran og taxi batan-on patay, 2 kauban angol
CEBU, Philippines - Namatay ang usa ka batan-on ug naangol ang duha niya ka kauban human nga ang ilang gisakyan nga motorsiklo nalimbuwad human kini nabag-iran og taxi samtang nagdagan sa national highway sa Barangay Sangat, San Fernando kaniadtong Lunes sa gabii.
Ang nakabsan sa kinabuhi mao si John Michael Diolan, 15, nga usa sa duha nga nag-angkas sa motorsiklo nga gimaneho ni John Racel Forrosuelo, 16. Naangol ‘sab ang laing nag-angkas sa motor nga si KC Jay Sagarino, 19, taga Barangay Balud, San Fernando. Walay lisensya pagmaneho og sakyanan ang 16-anyos nga si Forrosuelo. Ang mga saksi nagkanayon nga wala magsul-ob og crash helmet ang tulo ka managhigala samtang nagsakay sa motor.
Ang Carlight taxi nga giingong nakabag-id kanila gimaneho ni Romeo Alabat, hingkod ang panuigon nga taga Barangay Canduman, dakbayan sa Mandaue.
Matud ni SPO2 Victor Cuyno sa San Fernando Police Station nga samtang nagsubay sa highway sa barangay Sangat ang duha ka sakyanan, kalit lang mi-overtake ang taxi sa motorsiklo nga gisakyan sa tulo ka batan-on, apan nasaghiran ang motor.
Ang mga saksi nagkanayon nga diretso nga nalukapa ang motorsiklo ug ang mga biktima nangalukot sa karsada. Dali sila nga gidala sa Carcar Provincial Hospital, apan gumikan sa ka seryoso sa ilang kahimtang gibalhin sila sa Vicente Sotto Memorial Medical Center (VSMMC) ug didto na nga si Diolan namatay.
Matud pa ni SPO2 Cuyno nga walay mga helmet ang tulo ka biktima mao nga ang ilang mga ulo nakasinati og grabeng bun-og.
Ang taxi driver gitanggong na sa San Fernando Police detention cell samtang giandam na ang kaso nga ipasaka batok kaniya. (BANAT NEWS)
- Latest
