Tour guide nalumos

CEBU, Philippines -  Usa ka 26-anyos nga guide sa canyoneering sa Alegria ang napalgang patay kagahapon sa hapon, kapin 24-oras human kini nawala.

Si Aldrin Carba giingon nga nag-guide og mga bisita sa Kanlaob River sa Alegria sa dihang nahitabo ang gituhoang aksidente sa maong dapit.

Nawala ang maong guide buntag pa niadtong Sabado ug kagahapon sa hapon na kini'ng napalgang naglutaw sa maong sapa nga wa nay kinabuhi.

Ang canyoneering sa maong dapit maabot sa Kawasan Falls sa Badian, isip last stop sa maong adventure.

Si La Verne Salas, usa sa mga suod nga higala ni Carba, nagkanayon nga dugay na nga lifeguard ug swimming instructor ang maong guide.

Si Carba nagtrabaho isip lifeguard sa swimming pool sa Seaman's Hospital sa Mandaue City.  Sa iyang pagpanaw, daghan sa iyang mga higala nga mahilig usab og adventure ang naguol ug di pa makadawat sa maong balita.

"Grabe kabuotan, gentleman. He doesn't mind na maglisud siya basta matabangan lang niya and adventurous sad," matud pa ni Salas.  (BANAT NEWS)