Mga mayor sa First District mopaluyo ni Davide

CEBU, Philippines - Ang mga incumbent nga mayor sa unang distrito sa probinsiya mipadayag nga mosuporta kang Gobernador Hilario Davide, III sa umaabot eleksiyon sa tuig 2016 matud ni Mayor Valdemar Chiong sa dakbayan sa Naga.

Ang unang distrito naglangkob kini sa dakbayan sa Talisay, lungsod sa Minglanilla, dakbayan sa Naga, lungsod sa San Fernando, dakbayan sa Carcar ug lungsod sa Sibonga.

Si Chiong kinsa kaalyado sa Alayon Party nga nahinabi sa Banat News nagkanayon nga sa national ang ilang grupo Nacionalista Party (NP) ug kaalyado sila sa Liberal Party.

Matud ni Chiong nga sa lokal silang mga incumbent nga mayor sa unang distrito nga ubos sa Alayon lig-ong mosuporta kang Davide sa umaabot eleksiyon sa 2016.

Gibutyag ni Chiong nga silang mga incumbent nga mayor migama na og manifesto sa ilang pagpakita og suporta kang Davide.

Gipasabot ni Chiong nga nakita nila ang pagkasensiro sa serbisyo ni Davide hinungdan nga misaad silang mosuporta niini.

Nunot niini, subling namalibad si Chiong sa report nga modagan kini isip kongresista sa unang distrito sa probinsiya.

“Dili na tinuod, akong posisyon mo-retire nako sa 2016,” matud pa ni Chiong kinsa mipahibalo nga ang iyang anak nga si Atty. Kristine Vanessa Chiong maoy modagan isip mayor sa dakbayan sa Naga sa 2016. - /EIM) (BANAT NEWS)