Laing Acacia natumba

CEBU, Philippines - Natumba ang usa ka kahoy nga Acacia nga nagpangidaron og usa ka siglo alas 4:30 kagahapon sa kaadlawon sa Sitio Catugasan, Barangay Perelos sa dakbayan sa Carcar.

Matud pa ni PO1 Miguel Basabe, desk officer, nga ang natumba nga kahoy kabahin sa lima ka kahoy nga girekomendar sa DENR nga ipaputol.

Sumala ni Basabe nga hangtod karong orasa padayon pa ang clearing operation sa mga empleyado sa lokal nga kagamhanan sa dakbayan sa Carcar.

Dugang ni Basabe nga may usa ka tindahan ang natumbahan sa maong kahoy apan walay gikataho nga naangol sa pagkatumba niini.

Ang maong kahoy naa natumba sa dalan sa Barangay Perelos hinungdan nga mihuot ang dagan sa trapiko sa maong lugar kay usa lang ka lane ang abli sa trapiko.

Karong semanaha sugdan na sa Department of Environment and Natural Resources -7 ug Department of Public Works and Highways ang pagpamutol sa mga dagkong kahoy gikan sa dakbayan sa Naga hangtud na sa San Fernando.

Giingong peligro na sa kaluwasan sa mga motorista ang maong mga kahoy tungod sa kagabok na niini ug kahumok na sa yuta tungod sa pagsige og uwan. Kahinumdoman nga duha ka semana na ang nakalabay dihang usa ka trak ang natumbahan sa usa ka punoan gihapon sa Acacia nga kapin na usa ka gatos ka tuig. - /EIM) (BANAT NEWS)