Gubang bus sa Mandaue lisud na ipaayo

CEBU, Philippines - Maglisud na sa pag-paayo ang kagamhanan sa dakbayan sa Mandaue sa mga nagubang bus tungod sa dakung gahing salapi nga gikinahanglan.

Matud ni Engr. Marivic Cabigas, pangulo sa  General Services Office (GSO), nga panahon sa emerhensiya lakip na sa transport strike maoy naandan sa kagamhanan sa dakbayan ang pagpadagan og mga sakyanan nga mohakot sa ma-stranded nga pasahero. Hinuon gitataw ni Cabigas nga daghan gihapon sila og magamit nga sakyanan sama sa mga multicabs sa kabarangayan, bag-ong mga coasters ug uban pa nga kasamtangang gidestino sa nagkalainlaing buhatan sa kagamhanan.

Ang dakbayan adunay duha ka bus nga naangkon pinaagi sa donasyon nga gitawag kaniadto og Bus Ni Mayor nga dili na magamit.

Si Cabigas miingon nga ang Kaoshiung Bus nga hinatag sa kagamhanan sa dakbayan sa Sugbo ang dili na usab makadagan tungod kay guba ug kasamtangan pang gipaayo.

Nagbaton usab ang kagamhanan sa dakbayan og upat ka electronic cars nga matag adlaw gigamit sa kagamhanan alang sa libreng pagpasakay sa mga mangompra sa bag-ong merkado. (BANAT NEWS)