Mga kahoy sugdan og pamutol

CEBU, Philippines - Nasabutan na sa kadagkuan sa Department of Environment and Natural Resources (DENR-7) uban ang mga opisyal sa siyudad sa Naga ug lungsod sa San Fernando nga sugdan na karong adlawa (Hulyo 25, 2014) ang pagputol sa pito ka mga karaan na kaayong kahoy nga Acacia nga anaa sa daplin sa dalan sa siyudad sa Naga.

Ang tigpamaba sa DENR-7 Eddie Llamedo niasoy nga nasabutan sa tigum niadtong adlaw nga Miyerkules sa ilang buhatan nga dalion ang pagputol sa naasoy nga mga kahoy tungod sa kadelikado niini sa mangaging mga motorista. Gipasabot ni Llamedo nga sigon sa pakisusi sa ilang buhatan ang maong mga kahoy dili na madala pa og rehabilitation tungod sa kakaraan na niini.

Sigon pa niini nga nalakip sa kasabutan nga ang mga heavy equipment sa siyudad sa Naga ug sa Kapitolyo maoy gamiton sa pagputol sa maong mga kahoy samtang gamiton usab sa DENR-7 ang special tree cutting permit sa Department of Public Works and Highways (DPWH-7) nga giisyo sa labaw nga opisyal sa DENR Manila alang sa maong katuyuan.

Matud pa ni Llamedo nga sa Hulyo 30, 2014, sugdan usab ang pagputol sa laing tulo ka mga century old Acacia tree ug laing 39 ka mga non-Acacia trees sa lungsod sa San Fernando. Dugang pa niini nga human sa pagputol sa naasoy nga mga kahoy, mananom ang DENR-7 og mga seedlings sa naasoy nga lugar. (BANAT NEWS)