Tulo ka police stations gi-drug test

CEBU, Philippines - Tulo ka mga police station sa dakbayan sa Sugbo ang gihimoan og kinalit nga drug test kagahapon sa buntag ubos sa kamandoan sa Police Regional Office (PRO 7), aron pagsuta kung wala ba’y mga polis nga tiggamitan og ilegal nga drugas.

Ang Police Station 3 (Waterfront Police Station), Police Station 8 (Talamban Police Station) ug ang Police Station 10 (Punta Princesa Police Station) maoy gipaubos sa kinalit nga drug test.

Ang deputy chief sa PRO 7 nga si Senior Superintendent Conrad Capa maoy nangulo sa maong kalihokan ug gani apil ‘sab ang mga station chiefs sa maong buhatan nga mipaubos sa drug test. Ang Talamban Police Station ang personal nga giadto ni Capa, ug silang tulo ni Senior Superintendent Noli Romana ug ang hepe sa City Intelligence Branch, Superintendent Romeo Santander miapil sa drug test.

Gipasabot ni Capa nga kini nagpakita lang nga seryoso ang kapulisan sa rehiyon nga malimpyo gikan sa mga polis nga tiggamitan og drugas.

Si Capa miingon nga  gipili niya ang Talamban Police Station nga personal nga bisitahon gumikan sa iyang nadungog nga mga balita ug impormasyon  nga dunay mga polis nga nalambigit sa illegal drugs sa maong presinto.

Hinoon walay nagpositibo sa mga sakop sa kapulisan sa Talamban, Punta Princesa ug Waterfront  human sa maong drug test. Ang hepe sa maong buhatan nga si Sr. Insp. Bienvenido Miral mipasalamat sa maong kalihokan aron sab mapakita sa katawhan nga bisan pa man sa mga kontrobersiya sa maong police station limpyo sa drugas ang iyang mga sakop. Apan dunay usa ka  polis sa Waterfront nga paesplikahon kay wa motunga. (BANAT NEWS)