Picture ni Po1 Roa nag-viral

CEBU, Philippines - Nagpadayon ang pag-ila ug nahimo pa ganing viral ang litrato ni PO1 Mark Wilson Roa, kadtong polis sa Mabolo Police Station nga mitabang sa usa ka 75-anyos nga lalaking nahiyos ang ligid atubangan sa Carmelite Parish sa Bario Luz ning dakbayan niadtong Hulyo 15.

Si Roa kinsa nahinabi sa Banat News miangkon nga wala siya’y ideya nga gikuhaan siya og litrato sa maong lalaki ug gi-post diay kini sa Facebook.

Ang maong senior citizen dako kaayo og pasalamat kang Roa ug pinaagi sa social media iyang gipaabot ang subli niyang pagpasalamat.

Base sa uwahing pagsusi kagahapon sa hapon, miabot na og kapin sa 1,800 ka shares sa PNP Facebook ug kinse mil ka likes samtang kapin 1,000 ka shares usab sa FB ni Orlando Onoveso kinsa maoy orihinal nga mi-post niining maong post ug kapin sa kinse mil ang mi-like niini.

Daghan ang midayeg sa gihimo ni Roa kinsa miingon nga paigo na man kaniya ang pikpik sa abaga ug pasalamat tungod kay usa man siya ka polis ug ang pagtabang ilaha gyud kining trabaho.

Gawas sa pagdayeg sa publiko ilabi na sa mga netizens, gipaabot nga ilhon sa PNP ang iyang nahimo ug ipalanog kini sa uban aron himuong ehemplo sa ubang mga polis. (BANAT NEWS)