1,000 mobantay saCobra 70.3 Triathlon

CEBU, Philippines - Liboan ka sakop sa nagkalain-laing law-enforcement units sa Sugbo ang ipakatap alang sa seguridad sa mosalmot sa Cobra 70.3 Triathlon karong Agosto 3.

Kini langkuban sa mga sakop sa Central Command, Philippine National Police ug Naval Forces Central. Sa gipahigayong final coordinating conference kagahapon sa Police Regional Office-7, si Sr. Supt. Erson Digal, hepe sa Regional Operations and Plans Division (ROPD), miingon nga tanang personnel kinahanglang anaa na sa ilang designated area duha ka oras sa dili pa magsugod ang kalihukan.

Adunay sobra sa 2,500 ka mga contingents gikan sa 40 ka nasud ang mosalmot sa kalihukan.

Apil sa i-secure ang agianan sa mga partisipante lakip na ang hotel diin sila mopuyo.

Mipasidaan usab si Digal batok sa mga mangunguot ug snatchers nga posibleng mosiaw. Sa iyang bahin, si Insp. Isagani Bajao, deputy chief sa Regional Police Escort Unit, andam usab mohatag og escort personnel ngadto sa mga high-profile personalities nga mosalmot.

Si Frank Brazil, hepe sa City Traffic Management System (CTMS) sa dakbayan sa Lapu-Lapu, makigtagbo kang Gob. Hilario Davide III alang sa final plotting sa rota ilabi na sa Marcelo Fernan Bridge aron mahan-ay ang agianan sa mga tawo ug sa mga sakyanan. - /GMR) (BANAT NEWS)