Simpleng pagtabang sa polis nag-trending sa Facebook
CEBU, Philippines - Nag-trending sa social networking site nga Facebook ang usa ka Field Training Police (FTP) nga nadestino sa Mabolo Police Station, human gi-post ang iyang hulagway sa usa ka 75 anyos nga lalaki nga iyang gitabangan sa pag-ayo sa na-flat niini nga likid sa sakyanan, niadtong Hulyo 15 sa buntag sa gawas sa Carmelite Monastery, sa Barangay Bario Luz, Cebu City.
Ang FTP polis nga gitumbok sa maong hulagway naila nga si PO1 Mark Wilson Roa, 26, nga taga Maracas Lahug, Cebu City. Kinsa usa ka janitor kaniadto samtang nagtungha sa kursong Criminology.
“I'd like to take this opportunity to thank PO1 Roa of Cebu City who, last July 15 in front of the Carmelite Monastery, offered to help me change a flat tire without asking for anything in return. Your service to an unknown senior citizen may not seem much but it changed my regard for the PNP. In all of my 75 years, this is the first time I've been assisted so selflessly by a police officer. Again, much gratitude to you PO1 Roa and may you be blessed for your kind act. Kindly share so that everyone may know. I hope that this post will eventually reach him,” sumala pa sa gi-post ni Orlando Onoveso sa iyang Facebook.
Atol ning pagsulat sa balita, duna nay 118 ka shares ug 128 ang mi-like sa post sud pa lang sa siyam ka oras gikan pag-post niini. Gani duna pay mikomento nga maayo untang mosanay ang ‘tribu’ ni Roa.
Si PO1 Roa nga nahinabi sa Banat News mibutyag nga wala siya magtuo nga gikuhaan siya og hulagway sa lalaki nga iyang gitabangan.
Matud pa ni Roa nga samtang nag-assist siya sa trapiko sa maong lugar, naguwan-uwan niadtong tungora ug iyang nabantayan nga nagkaaberya si Enoveso kay na flat ang ligid sa unahan nga bahin sa sakyanan.
Ang mga dispatcher ang matud pa unang miduol sa tag-iya sa sakyanan ug mi-estorya nga maoy moayo sa sakyanan apan daw nagduha duha ang tag-iya hinungdan nga iya kining giduol ug mibuluntaryo sa pagtabang.
“Mura’g dili man gud siya mosalig sa kadtong miduol sir, mao ‘to miduol ko kay nagkuha na man pud siya og tools sa likod,” matud pa ni PO1 Roa.
Human niya naayo ang ligid nangutana kaniya ang tag-iya sa sakyanan kun unsa ang nakabutang nga pangalan sa iyang name cloth ug pagkahuman nagpasalamat ug milakaw.
Dinhi lang sa Banat News niya unang nahibaw-an nga na-trending siya sa Facebook.
Matud pa ni Roa nga ang pasalamat ug pikpik lang sa abaga gikan sa ilang matabangan paigo na kaayo nga balos sa iyang diyotay nga kahago. Gitug-an sab niini nga gikan pa diay sa iyang pagkabata gusto na kaayo kini nga mahimong polis ug pangandoy niya nga kung mahatagan og higayon gusto kining mamahimong sakop sa Special Weapons and Tactics (SWAT). - /EIM) (BANAT NEWS)
- Latest
