VM Gica ipasuspenso ni Mayor Garcia

CEBU, Philippines- Gipasakaan og kasong administratiba ni Dumanjug Mayor Nelson Garcia ang iyang bise mayor nga si Efren Guntrano Gica sa Hunta Probinsiyal sa Sugbo. Si Garcia gipahamtangan og 60 ka adlaw nga preventive suspension human gipasakaan og kiha ni Gica sa Hunta Probinsiyal.

Matud ni Garcia nga angayan usab pahamtangan og preventive suspension ang iyang bise-mayor.

Si Garcia nipakita og dokumento diin matud niya nga gipagawas ni Gica nga P21,435 ang iyang nabayran sa usa ka restaurant sa pagpakaon sa mga opisyal ug mga kawani sa Dumanjug sukwahi sa tinuod nga P11, 435 nga nabayran.

Giingong gipagawas usab nga 100 ka tawo ang nangaon sa maong dinner buffet niadtong Abril 25 apan ang tinuod 36 ka tawo ra.

Una nang gipasaka ni Garcia ang kaso sa buhatan sa Ombudsman sa niaging semana subay gihapon sa maong pasangil.

Matud niya nga angayan usab isuspenso si Gica ilabi na nga anaa siya’y mga ebidensya lakip na niini ang resibo gikan sa restaurant ug ang mga pangalan nga tinuoray nga nangaon. Subay niini gihagit ni Garcia si Gobernador Hilario Davide III nga mopakanaug og patas nga desisyon dili tungod kay iyang kaalyado si Gica sa Liberal Party. Gipasalig ni Davide nga patas ang iyang desisyon ug wala siyay’ dapigan sa away tali sa duha ka opisyal sa lungsod. - /GMR) (BANAT NEWS)