Swiss gikilkilan sa batan-ong babaye

CEBU, Philippines- Gisikop sa kapolisan ang usa ka minor de edad nga babaye human iyang gikilkilan ang usa ka langyaw nga iyang gihadlok nga siya mabdos ug nangayo og P5,000 sulod sa usa ka food chain sa usa ka mall sa Talamban, dakbayan sa Sugbo.

Ang langyaw nga midangop sa kapulisan naila nga si Jacob Hug, 66, taga Switzerland ug kasamtangang nagpuyo sa Doña Rita Village, Banilad. Sumala pa ni Chief Insp. Bienvenido Miral, hepe sa Talamban Police Station, nga nahinabi sa Banat News nga unang nagpakitabang sa kapolisan ang langyaw human nagsige na og pamugos og pangayo og kwarta ang usa ka batan-ong babaye kinsa namugos nga siya mabdos ug ang langyaw ang amahan. Apan matud pa wala gyud moangkon ang langyaw kay sayud kining dili siya makahatag og anak ug mipakita pa kini sa medical record nga nagsuporta sa iyang pamahayag.

Ang kapolisan mihimo sa usa ka entrapment operation batok sa babaye sulod sa usa ka food chain.

Apan sa dihang miduol na ang kapolisan dali usab nga nagpagawas sa iyang birth certificate ang babaye nga nagpakita nga siya usa ka 17-anyos pa lang.

“Dakpon na gyud unta sa mga sakop nato, pero naa man siya’y dala nga birth certificate mao to’ng nagpanagana ang atong mga sakop,” matud pa ni Miral.

Giimbitar na lang ang babaye sa presinto sa kapolisan aron paghimo og imbestigasyon ug mitug-an nga dili siya buntis ug gusto lang makakwarta gikan sa langyaw nga iyang naka-relasyon. Sumala pa ni Miral nga nagkasabot ra usab ang duruha ug misaad ang babaye nga dili na kini magsamok-samok pa sa langyaw ug dili na kini mangayo og kwarta. - /GMR) (BANAT NEWS)