Sea fans gi-surrender sa tag-iya og shellcraft
CEBU, Philippines- Laing katorse ka sako sa mga korals ang nadawat sa Provincial Anti-illegal Fishing Task Force sa miaging Biyernes gikan sa usa ka coral processor sa Barangay Cansojong sa siyudad sa Talisay.
Ang maong mga sinakong matang sa “Sea fans” nalakip sa mga endangered species. Si Loy Anthony Madrigal, hepe sa task force, nagkanayon nga gi-surrender sa mga tag-iya sa shop ang maong mga korals atol sa gipahigayong surveillance sa grupo sa maong barangay.
Ang shop nga buhatanan sa mga produkto gamit ang mga korals gipanag-iya sa magtiayong Alfredo ug Teresita Ylaya, mga residente sa maong dapit.
Matud ni Madrigal nga century-old na ang maong mga korals nga nasakmit. Iyang gisaysay nga gidili ang pagpanguha sa mga endangered nga korals sumala sa Republic Act 8550 o ang Fisheries Code of the Philippines.
Duna kini 12 hangtod 20 ka tuig nga pagkapriso o multa nga P120,000 kun mapamatud-ang nakalapas sa maong balaod.
Niadto usab sa miaging Huwebes, nasakmit sa grupo ni Madrigal ang sinakong mga kinhason nga gituohan usab nga endangered species sa Barangay San Roque siyudad gihapon sa Talisay. - /EIM) (BANAT NEWS)
- Latest
