Gipusil sulod sa videokehan

CEBU, Philippines- Patay ang usa ka 22-anyos nga ulitawo human pusila sa iyang silingan sulod sa videokehan nga ilang giinoman sa sitio Kulo, Kahumayan, dakbayan sa Danao ala una pasado niadtong Domingo sa kaadlawon.

Ang biktima mao si Rasieboy Labador Riston samtang ang suspetsado nailhan nga si Santiago Deretcho, pulos nagpuyo sa maong dapit.

Si PO3 Nelson Pantoja sa Danao City Police Station miingon nga ang duha sayo pa sa niaging Sabado sa gabii nag-inom sa maong videokehan ug nagpuli-puli og kanta.

Dugang pa ni Pantoja nga dihang nangahubog na, mitumaw ang panaglalis ug nag-ilogay sa microphone kay pulos gustong mokanta.

Matud ni Pantoja nga ang panaglalis ang nakaaghat sa suspetsado sa pag-ibot sa giloklok niining armas nga kalibre .38 ug dayong pusil sa biktima tumong sa dughan.

Human sa pagpusil ang suspetsado daling misibat pahilayo sa lugar samtang ang biktima dali untang gidala sa Danao District Hospital apan gideklarar kini sa mga doktor nga dead on arrival. - /GMR) (BANAT NEWS)