Bagyong Henry magdala og uwan sa Kabisay-an

CEBU, Philippines- Ang bagyong Henry magdala og kasarangang pagbunok sa uwan karong adlawa sa Visayas, Bicol Region, Dinagat ug Siargao Island ug sa mga probinsiya sa Surigao del Norte sumala pa sa Philippine Atmospheric, Geophysical and Astronomical Service Administration.

Ang mga residente sa  nahisgutang mga lugar giawhag nga mag-alerto sa posibleng baha ug pagdahili sa yuta.

Samtang ang mga mananagat ug mga gagmay’ng sakyanan sa kadagatan giawhag sa dili pagnabigar sa eastern seaboard sa Bicol Region, Visayas ug Mindanao.

Base sa weather bulletin sa mga alas 11:00 sa buntag kagahapon nahimutang kini sa 420 kilometer (km) sa sidlakan amihanang sidlakan sa Borongan, Eastern Samar.

Si Henry dunay gikusgon sa hangin nga 120 kilometer per hour (kph) ug 150 kph nga gikusgon sa unos ug miirog sa amihanang kasadpan sa gikusgon nga13 kph.

Karong buntag (Lunes) si Henry gibanabanang mahimutang sa 440 km sa amihanang sidlakan sa Virac, Catanduanes, sa Martes sa buntag mahimutang kini sa 360 km sa sidlakan amihanang sidlakan sa Aparri, Cagayan ug sa Miyerkules sa buntag si Henry mahimutang sa 210 km amihanan amihanang kasadpan sa Basco, Batanes.  - /EIM) (BANAT NEWS)