Mandaue mangandam ‘sab sa protest rally

CEBU, Philippines - Dili g’yud mokompiyansa ang mga opisyal sa dakbayan sa Mandaue bisan og ang kadagkoan sa National Confederation of Transportworker Union (NCTU) dili modayon sa  gitakda unta nila nga transport strike. Si Roger Paller nga maoy Public Information Officer (PIO) sa Mandaue miingon nga padayon sila nga mihimo og pagpangandam tungod sa gikatakda’ng “protest rally” sa mga sakop sa Pagkakaisa ng mga Samahan ng Tsuper at Operator Nationwide (PISTON) ugma.

Matud ni Paller nga ang mga sakyanan sa Mandaue nga ilang giandam naglakip kini sa mga multicab sa kabarangayan, close-type L300 van, bus ug mga dump truck sa City Engineering Office nga padaganon kun makita nga magnihit ang mga PUJ nga mobiyahe ugma. 

Si Greg Perez miingon nga ipadayon nila ang ilang protest rally nga gikatakda ugma’ng adlawa.

Giklaro ni Perez nga ang ilang grupo sa PISTON igo lang magpahigayon og protest rally aron pagpakita sa ilang pagsupak sa Joint Memorandum Order Number 2014-01.

Ang mga opisyal sa PISTON wala malakip sa mga lider sa transport groups nga gipatawag ni DOTC Secretary Joseph Emilio Abaya Jr. sa usa ka tigum kaniadtong Biyernes maoy hinungdan nga ang gikatakda nila nga protest action ilang ipadayon.

Gitataw hinuon ni Perez nga dili sila mamugos sa uban nga mga drayber ug operator nga mokuyog gayud sa protest rally sa mga drayber nga ilang pagahimoon atubangan sa City Hall. Gituohan nga kay mag-rally man ang mga drayber aduna g’yuy mga jeepney nga dili makapamasahero ugma atol sa adlaw nga tingklase.  (BANAT NEWS)