Daghang drayber dili gusto’g welga

CEBU, Philippines - Dili suportado sa kinabag-an nga mga drayber ang gilaraw nga pagpadayon paghimo’g protesta sa mga sakop sa grupo’ng PISTON pinaagi sa dili pagbiyahe sa ilang mga sakyanan ugma’ng adlawa.

Ang mga sakop sa CITRASCO ug National Confederation Transportworkers’ Union Alliance of Progressive Labor-Visayas daan na nga mipahibalo nga dili sila mouban sa paghimo’g protesta nga kalihukan.

Kini tungod kay ang kadagkoan sa Department of Transportation and Communications (DOTC) mitugot man nga himoan og “review” ang kontrobersyal nga Joint Administrative Order 2014-01.

Si DOTC Secretary Joseph Emilio Abaya mimando nila ni LTO-7 Acting Regional Director Arnel Tancinco ug LTFRB-7 Regional Director Ahmed Cuizon nga paminawon ang sentimento sa mga public utility vehicles.

Sila si Cuizon ug Tancinco nakigtagbo na sa mga lider sa lainlaing transport group kagahapon aron nga tigumon kun unsa ang mga sentimento sa mga PUV drivers ug operators.

Si Tancinco gipasaligan ni CITRASCO chairman Benjamin Ryan Yu nga andamon nila daan kun unsa nga lagda sa kontrobersyal nga Joint Administrative Order ang angay’ng himoan og kausaban.

Matud ni Romeo Armamento, pangulo sa National Confederation Transportworkers’ Union Alliance of Progressive Labor, nga gusto nila nga ipawagtang ang lagda nga sila’ng mga operators og public utility vehicles apilon sa pagmulta sa mga sala nga mahimo sa ilang drayber.

Gikuyawan ang mga operators kay ang bag-ong lagda nga gipatuman sa DOTC mopakanselar sa prangkisa nga giisyu ngadto sa mga operator kun adunay ilang mga drayber nga nakahimo og salaod katulo ka higayon.

Ang mga PUV operator miingon nga sayon ra ma-revoke ang ilang prangkisa kay sa kadaghan sa ilang mga drayber dili malikayan nga daghan kanila ang mohimo og bug-at nga kalapasan sa balaod.

Gusto sa mga PUV operators nga ang sala nga mahimo sa ilang mga drayber dili sila apilon sa pagsilot. Ang uban nila nga gireklamo mao ang dagko kaayo nga multa nga gipahamtang sa DOTC.

Ang mga drayber miingon nga samtang daghan ang angayan nga ipatuman kay makaleksyon kini sa mga motorista, apan ang uban nga multa maisip nga dili na makiangayon.

Si Kongresista Raul del Mar nga maoy nagtabang sa mga drayber aron magkaatubang sila ug si DOTC Secretary Abaya miingon nga ang mga sugyot gikan sa mga transport sectors iduso kini adto sa DOTC aron mahimoan og pagtuon.

Si Konsehal Dave Tumulak miingon nga pangandaman gihapon nila sa Cebu City Hall ang gikatakda nga welga bisan og ang ubang drayber mipahibalo na nga dili sila mokuyog sa paghimo og protesta.  (BANAT NEWS)