11 ka paresan gikasal provincial jail
CEBU, Philippines - Gikasal ang 11 ka piniriso sa ilang mga kapuyo sulod sa Cebu Provincial Detention and Rehabilitation Center (CPDRC) sa miaging adlaw.
Usa sa mga midawat sa sakramento sa kasal sila si Renaldo ug Maribel Arsenal, nga nagpuyo sulod sa 13 ka tuig.
“Kasagaran man gud diri mga nag live-in. Gibuhatan nato og paagi nga mahatagan sila sa blessing sa kaminyoon,” matud ni CPDRC Warden Bobby Manansala.
Matud ni Marco Toral, CPDRC consultant, ang maong kasal sa Mayo pa gipangandaman sa Kapitolyo uban sa abag sa Missionaries of Charity Cebu, nga maoy nitabang og lukat sa mga papeles sama sa marriage certificate alang sa mga kaslonon.
“Our intention is to give them hope that they can still live a normal life even if they are here inside,” matud pa ni Toral.
Si Rev. Fr. Crescenciano Ubod mao’y mi-officiate sa kasal mipahimangno sa mga gikasal nga dili putlon ang ilang koneksiyon sa Ginoo aron molungtad ang ilang relasyon. (BANAT NEWS)
- Latest
