Gisudlan sa kalag sa kauban

CEBU, Philippines - Kalag sa traffic enforcer nga namatay human mabanggai sa usa ka Koreana gikatahong misulod sa lawas sa usa sa iyang kaubang traffic enforcer ug nanugon sa iyang inahan kagahapong adlawa sa Cebu City Medical Center.

Ang bana sa maong enforcer  mihangyo sa Banat News nga dili lang hinganlan ang iyang asawa nga gisudlan sa kalag ni Maria Theresa Bascones. Sa atubangan nga bahin sa CCMC nagtapok ang mga tawo ug mga traffic enforcers human nga nagping-it sa kasakit ang maong traffic enforcer nga gikatahong gisudlan ni Bascones. Sumala pa sa bana sa enforcer nga sa adlaw nga Huwebes pa nihangyo kaniya si Bascones nga mosulod sa iyang lawas apan wala pa makadesider ang maong enforcer kung mosugot ba siya sa hangyo ni Bascones.

Apan kagahapong adlawa misulod gyud sa lawas niya si Bascones kay gusto niining makig-estorya sa nabiyaang inahan nga si Teresita.

Misinggit ug midangoyngoy ang inahan ni Bascones human nga miingon ang gituohan niyang si “Marty” nga iyang anak.

Miingon si “Marty” nga “sakit kaayo” ug di niya madawat ang iyang kamatayon. Mitubag ang inahan nga ipapriso gyud niya ang Koreana tungod kay mipasalig si Mayor Michael Rama nga motabang kanila.

Human sa dul-an lima ka minuto nga panagtagbo mihangyo ang inahan ni “Marty” nga padayon na lang sa iyang panaw ug dili na angay mawili kaniya.

Ang inahan mitug-an nga ang iyang namatay nga anak maoy tigpalitan og tambal sa iyang sakit ug basin nabalaka kini kaniya tungod kay masakiton man siya. (/EIM)(BANAT NEWS)