Ex-con may granada napusilan

CEBU, Philippines - Patay ang usa ka ex-convict human pusila sa duha ka wala mailhing mamumuno niadtong Huwebes sa gabii sa Laray, Carreta, dakbayan sa Sugbo.

Ang biktima giila nga si Ramil Inot Feliciano, 29, alyas “Bolantoy” nga nagpuyo sa maong dapit.

Matud ni SPO1 Ruth Bongo-Violango, imbestigador sa Homicide Section sa Cebu City Police Office (CCPO), nga nahinabi sa Banat News nga samtang nagbarug si Feliciano sa daplin sa dalan, duha ka wala mailhing lalaking nagsakay og motorsiklo ang mipusil sa biktima.

Dali pa untang gidala sa tambalanan ang biktima apan nakabsan gyud kini sa iyang kinabuhi gumikan sa samad pinusilan sa iyang ulo ug dughan samtang misibat ang mga mamumuno.

Atol sa pagsusi sa patay’ng lawas sa biktima, nakaatras og kalit ang kapolisan ug abtik nakadagan ang mga tawo nga midugok sa nahitaboan human usa ka granada ang nakuha gikan sa bulsa sa biktima.

Gipasabot ni Violango nga posibleng pangdepensa ang dalang granada ug posible usab nga duna kini dautang plano nga buhaton.

Naila nga “siga” sa maong lugar ang biktima kinsa matud pa usa kini sa mga gikahadlokan sa maong lugar.

Dismayado si Violango gumikan kay wala’y motestigos sa maong panghitabo bisan daghang tawo ang nakakita sa pagpamusil.

Kanhi nabilanggo sa New Bilibid Prison sa Muntinlupa ang biktima tungod sa kasong robbery. (/GMR)(BANAT NEWS)