Minglanilla vendors DI gustong mabalhin

CEBU, Philippines - Supak ang mga manindahay sa merkado publiko sa lungsod sa Minglanilla  nga ibalhin sila sa bag-ong gitukod nga merkado balor og P150 milyones, 500 metros ang gilay-on gikan sa karaang merkado sa Poblacion Ward II.

Kini ang gipadayag sa mga opisyales sa Minglanilla Vendors Multi-Purpose Cooperative ngadto sa mga opisyal sa Kapitolyo.

Usa ka position paper nga gipirmahan nilang Sherbie delos Reyes, Arthuro Espina, Malik Abato, Raulito Castañares ug Vose Cheryl Barinque ang giduso sa buhatan ni Gob. Hilario Davide III ug sa Hunta Probinsiyal.

Ilang gihangyo ang lokal nga kagamhanan sa lungsod ug sa probinsiya ingon man si Kong. Gerard Anthony Gullas nga dili sila ibalhin sa bag-ong merkado ug patun-an ang epekto niini sa gagmay’ng patigayun.

Matud sa mga opisyal sa kooperatiba nga lima lang sa kapin 300 ka manindahay ang nakatambong sa public hearing diin giingong gituyo nga isekreto lang sa mga lokal nga opisyal.

Gipasalig ni Sandy Enad, planning officer sa lungsod, ang laing public hearing apan sumala pa sa mga opisyal sa kooperatiba nga wala na’y laing public hearting nga nahitabo gawas sa unang napahigayun nga sagad sa nanambong mga kapitan sa barangay nga kaalyado sa administrasyon.

Atol sa maong public hearing, gipahibawo nga P70 milyones ang gastohon sa proyekto gikan sa huwam sa Development Bank of the Philippines apan nakurat ang mga manindahay sa gimantala sa project monitoring board nga niabot na og P150 milyones ang kinatibuk-ang proyekto.

Dili makatoo ang mga manindahay nga moabot sa maong kantidad ang proyekto samtang nabalaka nga sila ang katawhan ang magsagubang sa pagbayad sa utang sa bangko.

Matud pa nga gagmay kaayo ang mga pwesto sa bag-ong merkado nga bayran og tag P50 mil gawas sa binuwan nga abang ug uban pang bayranan.

Gipadayag sa mga manindahay nga ang karaang merkado ang tubag sa panginahanglan sa katawhan apan giingong wala maatiman sa lokal nga kagamhanan sama sa kalimpyo ug ang paghuot sa trapiko sa lugar. Wala usab magbutang og opisyal sa merkado nga modumala gawas sa kolektor nga molibot sa mga pwesto.

Usa sa dakung kabalaka nga gibati sa mga manindahay mao ang pagtukod og usa ka dakung tindahan sa nahimutangan sa karaang merkado nga mao na unya ang mosuyop sa ilang mga kustomer.

Gibasehan sa mga manindahay ang nahitabo sa Tabunok Public Market sa dakbayan sa Talisay nga gibalhin sa Lagtang diin nahimo karong “white elephant.”

Gimando sa bag-ong namunoan sa siyudad ang pagpabalik sa mga manindahay sa Tabunok.

Dili buot ang mga manindahay sa Minglanilla nga mahisama ang ilang dangatan sa Tabunok nga nakasinati og pagminus sa ilang kita human sila gibalhin sa Lagtang. Ang karaang merkado sa Minglanilla gigastuhan sa taga Malaysia ubos sa 25 ka tuig nga Build-Operate-Transfer scheme.

Tulo ngadto sa upat ka tuig mapupos na ang maong kontrata ug ang duha ka building hingpit na nga panag-iyahon sa kagamhanan sa lungsod sa Minglanilla.  (BANAT NEWS)