Napilde namusil

CEBU, Philippines - Patay ang usa ka lalaki human pusila sa iyang silingan kinsa napilde sa hantak balor og P200 sa Basak, San Nicholas, dakbayan sa Sugbo kagahapon sa buntag.

Ang biktima naila nga si Stephen Cuizon, 18, ulitawo, walay trabaho samtang ang suspetsado naila nga si Roberto Amara, hingkod nga taga Mambaling.

Sumala pa sa igsoon sa biktima nga si Joseph nga alas 2 sa kadlawon iyang nabantayan nga nagdula pa og hantak.

Pagka-buntag gisugo sa iyang igsoon ang biktima nga mopalit og sud-an sa gawas apan gi-atangan sa suspek dayon pusil sa dughan. Apan nakadagan pa pauli ang biktima sa ilang balay ug naka-estorya pa nga si Amara ang nagpusil niya.

Daling gidala sa Cebu City Medical Center (CCMC) ang biktima apan alas 9:30 sa buntag nakabsan sa iyang kinabuhi samtang ang suspek daling nisibat.  (BANAT NEWS)