Green apple drugas na?

CEBU, Philippines - Gisusi karon sa kapolisan ang giingong bag-ong matang sa ginadiling drugas nga gitawag og green apple.

Kini bisan wala’y impormasyon labot sa maong drugas nga nahipos ang kapolisan sa Sugbo sumala pa ni Police Regional Office-7 Director Prudencio Bañas.

Ang Regional Anti-Illegal Drugs Special Operations Task Group (RAIDSOTG-7) ang gitahasan ni Bañas nga mohimo og dugang pakisusi aron maklaro kung naa na ba sa Sugbo ang maong matang sa drugas. Usa sa target sa kapolisan ang pagsubay sa mga night clubs ug bars labi na kadtong suroyanan sa mga adunahan nga maoy lagmit mopalit sa maong matang sa drugas.

Matud sa opisyal nga gikinahanglan nga makakuha sila og mga ebidensiya aron sa labing daling panahon masumpo kini ug dili makakuyanap.

Plano usab nga makig-alayon sa mga drug abuse councils sa siyudad ug probinsya aron sila usab ang mo-coordinate sa Department of Education aron mopasabot sa kabataan sa delikadong epekto ngadto kanila sa tanang matang sa ginadiling drugas.

Giingong mas wild ang usa ka tawo kung makatumar sa kapsula sa maong drugas nga gitawag og green apple.  (BANAT NEWS)