Konsehal, mga tanod gihagit sumbagay
CEBU, Philippines - Gisikop sa mga barangay tanod ang usa ka hubog nga misulong sa barangay hall ug nanghagit og sinumbagay sa mga duty nga tanod ug konsehal sa Binaliw, dakbayan sa Sugbo.
Gipaslak sa detention cell sa Talamban Police Station mao si Romeo Villamor, 49, biyudo, ug nagpuyo sa maong lugar.
Matud ni SPO4 Alejandro Sarvida sa Talamban Police Station gustong magpahatud sa laing barangay si Villamor kay moduaw sa namatay niyang higala nga dugay na diay nga nalubong.
Ihatud unta sa usa ka tanod gamit ang motorsiklo apan mireklamo si Villamor kay gusto nga multicab ang gamiton apan wala mosugot ang taga barangay.
Kini ang hinungdan nga nanghagit og sukmagay sa mga duty nga tanod ug usa ka konsehal si Villamor. Gisulayan unta pagpakalma sa mga tanod apan misulay na hinoon pagpanumbag.
Matud ni Sarvida nga dihang nahuwasan na si Villamor sulod sa detention cell, dili masukod ang pagbasol niini gumikan kay wala masayod sa iyang gibuhat. (BANAT NEWS)
- Latest
