Mga bus makapamasahero dinhi sa dakbayan kun dunay strike

CEBU, Philippines - Ang Land Transportation Franchising and Regulatory Board (LTFRB) mitugot sa mga bus nga makapamasahero dinhi sa dakbayan sa Sugbo ug ubang bahin sa dakbayan aron masakyan sa mga pasahero nga ma-stranded kun mag-strike ang mga drayber karong adlawa. Matud ni LTFRB-7 Regional Director Ahmed Cuizon nga ang mga Ceres Bus misaad na nga sila mopadagan og mga bus sa lainlaing dapit dinhi sa dakbayan kun masuta na nga adunay kakuwang og mga passenger jeepneys.

Daghang mga PUJ drayber ang miingon nga dili sila mowelga apan magpanon sila pag-adto sa City Hall sa pagtambong sa public hearing. Gawas sa public hearing didto sa Cebu City Hall karong buntag, ang mga  lider sa lainlaing kahugpongan sa mga drayber adunay kahigayonan  nga makahinabi sila ni DOTC Secretary Joseph Emilio Abaya.

Dinhi sa dakbayan sa Sugbo, ‘tag P10 ra ang plete sa mga bus sa bisan asa nga rota.