Habal-habal drayber kritikal

CEBU, Philippines - Grabeng pagkaangol sa usa ka drayber sa habal-habal human pusila sa sitio Tubigan, Lawaan, dakbayan sa Danao niadtong Domingo sa gabii.

Si SPO4 Arestio Espina miila sa biktima nga si Gerry Capote, 44, nagpuyo sa maong dapit samtang wala mailhi ang namusil kinsa daling nakasibat palayo.

Matud ni Espina nga gikan pa naghatud og pasahero ang biktima sa barangay Poblacion sa maong dakbayan ug dihang padulong na pauli sa ilang panimalay kalit lang gipusil sa makadaghang higayon sa armadong lalaki nga nagsunod kaniya sakay sa motorsiklo.

Ang biktima nakaangkon og samad pinusilan sa buko-buko, dughan ug lakip na sa tuong bahin sa nawong ug nakamaneho pa kini sa iyang motorsiklo padulong sa daghang panimalay sa maong lugar.

Gihatod sa mga molupyo sa maong dapit ang biktima sa Danao District Hospital apan gibalhin sa Vicente Sotto Memorial Medical Center sa dakbayan sa Sugbo. - /GMR) (BANAT NEWS)