JVR: “Tabang sa kabus hangtud kamatayun”

CEBU, Philippines - “Kamatayun ra ang makapahunong sa akong pagtabang sa mga kabus,” pasiunang sulti ni Talisay City Mayor Johnny De los Reyes sa iyang State of the City Address (SOCA) kagahapon sa hapon.

Sa wala pa i-presentar ni De los Reyes ang iyang nahimo, gipaambit niya ang kalisud nga naagian sa iyang pamilya.

Lakip sa gihisgutan sa mayor ang pagkwestiyon sa pagkabaton karon og mga sakyanan sa iyang mga anak. Matud niya nga sa wala pa siya nahimong mayor sa Talisay, giutangan niya ang iyang mga anak og sakyanan.

Sa usa ka oras ug pito ka minutos nga SOCA sa mayor iyang giyagyag ang mga proyekto sa usa ka tuig niyang paglingkod.

Kini naglangkub sa pagpanghatag og mga foot path ug pathways sa kabarangayan, patubig,  pag-ayo sa mga puso diha sa kabarangayan ug mga eskwelahan ug pagpatukod og paanakan ug pagpanglimpyo.

Pagpatukod og steel gate ug koral sa motorpool, pagpatukod sa PMS station housing diin ang maong ekipo maka-detect sa gikusgon sa hangin ug uwan.

Gipanghambog usab sa mayor ang extension sa iyang buhatan ngadto sa ilang balay diin bisan og gabii moatiman gihapon siya sa mga kabus nga nanginahanglan sa iyang tabang.

Libreng sakay alang sa mga Talisaynon diin nagpalit siya og duha ka mga bus.

Matud sa mayor nga gikan sa iyang bahin sa iyang resort ang gipamalit niya sa maong mga bus.

Pagpaayo sa seawall ug expansion sa pond C sa landfill, rehabilitation sa landing shrine ug rehabilitation sa sports complex.

Kabahin sa social services gipanghambog ni De los Reyes nga 1,250 ka kabus nga Talisaynon ang nahatagan og PhilHealth cards. Matud sa mayor nga ubay-ubay na usab ang nakadawat sa burial assistance ubos sa iyang administrasyon ug calamity assistance.

Sa health services, gipanghambog sa mayor ang indigent pharmacy diin ang mga kabus mahatagan og libreng tambal ug duna usab sila’y gipahigayong medical ug dental mission matag semana sa kabarangayan. Duna na usab unya’y medical laboratory ang Talisay alang sa mga kabus.

Kabahin sa kahusay ug kalinaw nalipay ang mayor nga miubos ang krimen sa siyudad.

Ang siyudad adunay P172.5 milyones nga income karong tuiga tungod kay daghan na ang mga negosyanteng mamayad og business permit tungod kay dili na kini lisud-lisoron.

Damgo sa mayor nga ang Talisay mahimong “tourist destination of the south” diin plano niya nga i-develop ang sapa sa Mananga nga mahimong tourism site ug palawman kini aron masulod ang dagat ug mabutangan og mga jet ski ug ang kabukiran mabutangan kini og cable car. - GMR) (BANAT NEWS)