Polis nadakpan sa drug den

CEBU, Philippines - Usa ka polis nga gidudahang “drug protector” ang naapil og kasikop diha sa usa ka drug den atol sa buy-bust operation sa Provincial Intelligence Branch (PIB) ug Provincial Anti-Illegal Drugs Special Operation Task Group (PAIDSOTG) sa Sitio Intermedia, Barangay Poblacion, Borbon kagahapong adlawa.

Apan kusganong gihimakak ni PO2 Bernard Almeda nga nadestino sa Borbon Police Station, ang alegasyon batok kaniya.

Target unta sa maong operasyon ang usa ka Edwin Cabahug alyas Jong-jong nga giila nga level 2 drug pusher sa maong lugar, apan kini nakaikyas atol sa maong operasyon.

Nasikop hinuon si PO2 Almeda ug ang usa ka Zeev Tulod diha sa sulod sa panimalay ni Cabahug.

Nakuha kang Almeda ang usa ka government-issued .45 caliber pistol ug tulo ka magazines nga duna’y 21 ka bala.

Nakuha sa kapulisan sa balay ni Cabahug ang usa ka dakong pakete, tulo ka medium size ug usa ka gamay nga pakete nga pulos may sud nga gidudahang shabu nga gibana-banang mokabat sa P50 mil.

Wa magpa-interbyu ang maong polis sa mga sakop sa media gawas sa pagtubag lang og “no comment.”

Apan matud pa sa director sa Cebu Provincial Police Office, Senior Superintendent Noel Gillamac, si Almeda nangangkon nga gisugo siya sa iyang hepe nga mag-monitor sa kalihokan sa drugas sa maong lugar. Ug tayming lang nga duna’y gihimo nga buy-bust ang kapulisan ug naapil kini og kasikop.

Apan nasayran sa Banat News gikan kang Superintendent Rodulfo Albotra nga ang unang pasumangil ni Almeda nga miadto kini sa maong lugar kay gusto lang kini motan-aw sa mga hiniktang manok ni Cabahug ug wala kini labot sa kalihokan sa suspek sa drugas.

Ang hepe ni Almeda nga si Inspector Glen Devocion mikompirmar ‘sab sa pangangkon ni Almeda nga iya kining gisugo aron monitoron  ang kalihokan sa drugas sa maong lugar.

Apan si Gillamac dili motuo sa tubag ni Devocion tungod kay nasayod man ang maong opisyal nga dunay kamandoan sa PNP nga gidili ang pagsud sa laing local police unit sa hurisdiksyon sa uban.

Tungod sa pagkompirmar ni Devocion, gimando ni Gillamac nga apilon og imbestigar ang maong opisyal.

Si Albotra, hepe sa Provincial Intelligence Branch (PIB)  mibutyag duna na sila’y mga report  nadawat nga may usa ka polis nga protektor sa ilegal nga drugas sa Borbon, apan wa pa silay ideya kung kinsa hangtud nga nadakpan si Almeda.

Gitanggong na sa Consolacion detention cell si Almeda ug si Tulod alang sa pagpasaka og kaso. - /EIM) (BANAT NEWS)