Nadat-ogan sa damyo sa barge patay

CEBU, Philippines- Patay ang usa ka tripulante sa barge nga misulay og katkat apan nahulog ug natabunan sa damyo sa barko diha sa Tangi Wharf, Barangay Tangi, Dumanjug niadtong nakalabay nga hapon.

Ang biktima naila nga si Marcelino Berdon Jr., 31, taga Barangay Basak, Guilhulngan, Negros Oriental ug nagtrabaho sa LCT San Juan Cargo Ship isip pump man.

Matud pa ni SPO1 Samuel Casipong sa Dumanjug Police Station nga nahinabi sa Banat News nga base sa ilang gihimo nga imbestigasyon nasayran nga dangog ang puthaw nga damyo nga gikatkatan ni Berdon mao nga nadakin-as kini ug natabunan niini.

Grabeng bun-og sa iyang ulo ang naangkon ni Berdon nga hinungdan sa iyang kamatayon.

Ang kapitan sa maong barge nga si Domingo Sumampong, 54, nga taga Palanas, Ronda, boluntaryo ‘sab nga mitahan sa iyang kaugalingon sa kapulisan sa maong lungsod.

Apan sumala pa ni Casipong nga human sa pipila ka oras gipagawas ra sab nila ang kapitan sa maong barko, human nga matud pa nagkasinabot ra sab ang pamilya ug ang tag-iya sa barge nga tabangan ang pamilya sa namatay.  - /EIM) (BANAT NEWS