Ordinansahon sa no parking area

CEBU, Philippines - Hayan nga mapasar na sa Mandaue City Council sa sunod nga regular session ang ordinansahon nga mag-ila sa mga dapit sa dakbayan sa Mandaue nga ideklarar nga “No Parking Area” sa mga sakyanan.

Kini  maoy gibutyag ni Konsehal Elstone Dabon nga maoy tsirman sa Committee on Transportation sa konseho sa dakbayan sa Mandaue nga maoy misugyot sa maong ordinansahon.

Matud ni Konsehal Dabon nga ilang gikonsiderar ang gipadayag nga sentimento sa pipila ka barangay kapitan nga wala makagusto sa pipila ka karsada nga gilakip unta sa gidili ang pag-parking sa mga sakyanan.

Gisugyot sa mga kapitan nga ang mga karsada sa ilang barangay nga minus ra ang mga sakyanan nga mangagi dili lang ideklarar nga No Parking Area

Matud ni Dabon nga si Edwin Ermac, operation chief sa Traffic Enforcement Agency of Mandaue (TEAM), ilang gitahasan sa paghimo og pagtuon sa pagsulbad sa suliran sa trapiko sa maong dakbayan. Si Ermac misugyot nga tun-an g’yud unta sa mga sakop sa traffic board kun unsa nga karsada nga dili na angay’ng itugot ang pag-parking sa mga sakyanan.

Ang sugyot ni Ermac maoy nakaaghat ni Konsehal Dabon sa pagpangamahan og ordinansa nga mag-ila sa mga karsada sa Mandaue nga ideklarar nga No Parking Anytime. Adunay mga opisyal sa barangay ug magpapatigayon nga mihangyo nga magbutang og mga oras nga itugot usab ang pag-parking sa mga sakyanan daplin sa karsada.

Si Konsehal Dabon miingon nga ang maong hangyo ilang gihatagan og konsiderasyon nga maoy hinungdan sa pagsuta kun unsa nga oras nga daghang moagi nga sakyanan sa mga karsada.  (BANAT NEWS)