Mga mangingisda gipangdakop

CEBU, Philippines - Napulo ka mananagat ang gidakop ug gisakmitan og daghang isda nga mokantidad og P30 mil tungod kay nasakpan nga mihimo’g illegal nga matang sa pagpangisda didto sa kadagatan sa lungsod sa Bantayan. Ang mga mangingisda gidakop sa kapolisan ug sa mga sakop sa Bureau of Fisheries ang Aquatic Resources (BFAR) nga gipangulohan ni Marlon Marande.

Ang mga dinakpan tripulante sa Fishing Boat Tristan Mar nga nagbase sa Sagay City, Negros Occidental ug nasakpan nga nangisda  sa kadagatan sulod sa 15 kilometros gikan sa baybayon sa isla sa Mambacayao.

 Si Senior Inspector Jayme Santillan sa Bantayan Police Station miingon nga ang mao nga commercial fishing vessels adto ra unta dapit sa Masbate ug Negros managat apan misulod sila sa dapit nga gidili kanila. Nasakmit gikan kanila ang 30 ka banyera sa lainlaing isda. Matud pa nga gipanghatag ra ang mga isda nga nasakmit. Ang mga dinakpan gitakda nga pasakaan og kaso nga paglapas sa Fisheries Code.  (BANAT NEWS)