Gidudahang terorista gidakop

CEBU, Philippines - Usa ka Australian national nga nagtudlo ug nagsuporta og jihad ug gidudahang nag-awhag og terorismo nga pinangita sa ilang nasud ang gisikop sa Regional Intelligence Division (RIB), Bureau of Immigration (BI) ug Special Weapons and Tactics (SWAT Team) sa giabangan niining apartment kauban ang usa ka Filipina diha sa Barangay Pajac sa dakbayan sa Lapu-Lapu.

Apan ang kapolisan miangkong wala silay nakuhang ebidensya o ba kaha adunay terror record ang suspek nga si Robert Edward Musa Cerantonio, 29, nga giingong dul-an na sa usa ka tuig nga nagtagotago dinhi sa Pilipinas.

Ang operasyon gipangulohan sa deputy chief for administration sa Regional Police Office (PRO 7) nga si Senior Superintendent Conrad Capa, alas- 4 sa kaadlawon.

Ang mga awtoridad armado og warrant of deportation sa Bureau of Immigration human gikansela ang iyang pasaporte sa ilang nasud ug gipangita na ‘sab kini sa Australian Federal Police.

Ang Filipina nga giapil og sikop ug giimbestigar karon mao si Jean Montarye, alyas Myrna Asnawi nga taga Mindanao.

Di pa kasiguro kun terorista

Sa pamahayag ni Chief Superintendent Prudencio Tom Bañas, director sa PRO 7 sa mga tigbalita , dili pa sila makasiguro kun terorista ba gyud si Cerantonio, apan sa mga nakuha nga impormasyon sa kapulisan gikan sa ilang mga kaubanan sa ubang nasud, posibling duna’y kalambigitan si Cerantonio sa teroristang kalihokan.

Base sa report sa Sydney Morning Herald (sa Australia) sa ilang online news,  gipangita si Cerantonio  sa Australian Federal Police gumikan sa kalapasan niini sa Australia's Foreign Incursions Act, human kini dayag nga misuporta sa gipanghimo sa mga terorista.

Miapil usab siya sa nanawagan pinaagi sa iyang Twitter account ug Facebook account sa tanang Muslim sa kalibotan nga moapil sa “jihad” o “holy war” sa Iraq ug Syria,  gisuportahan usab niya ang Islamic State of Iraq and Syria (ISIS) nga kaalyado kaniadto sa Al-Qaeda  apan gitawag na sila karon nga Islamic State of Iraq and the Levant (ISIL).

Jihad sa Middle East

Ang ISIL ug Al-Qaeda mitabang sa rebelyon Free Syrian Army (FSA) sa Syria nga nakiggiyera sa gobiyerno ni Syrian President Al Assad, apan nagkabingkil ug nagkaunay ang tulo.

Dihang nakompleto na ang usa ka dekadang pagpundo sa Amerika sa Iraq nakakita og higayon ang ISIL nga atakehon ang mga probinsya sa amihanang bahin sa Iraq nga silingan sa Syria.

Ang ISIL mideklarar sa maong mga lugar nga usa ka “caliphate” nga gipangulohan ni Abubakar al-Baghdadi isip caliph. Apan kini gisupak sa mga lider sa mga kanasuran sa Middle East.

Tungod sa hulga sa ISIL ang Amerika mipadala og balik og 500 ka sundalo isip advisers sa Iraq Army aron bawion ang maong mga probinsya.

Ang giyera didto maoy usa sa hinungdan sa pagsaka sa presyo sa produktong petrolyo sa kalibotanong merkado.

Sikat sa jihadist websites

Si Cerantonio ang naila sab nga top 2 most influential preachers online, diin ang iyang mga followers sa facebook ug twitter mga ‘foreign fighters’ nga miapil sa Jihad sumala pa sa International Centre for the Study of Radicalization and Political Violence at King's College, London.

Ang kauban sab ni Cerantonio nga si Montayre ang gisikop sab sa kapulisan gumikan duna diay kini kaso nga estafa.

Nakuha sa kapulisan gikan sa panimalay ni Cerantonio ang daghang sim cards, cellphones, electronic devices ug ingon man 14 mil pesos ug mga salapi sa nagkalain-laing nasud.

Wala gitug-an sa kapulisan kung asa na gitanggong si Cerantonio apan sa nakuha nga impormasyon sa Banat News, dali kini nga gidala sa kaulohang Manila aron i-deport.  (/EIM)(BANAT NEWS)