Enforcer sa Talisay gipasanginlang nangilkil

CEBU, Philippines - Gipasanginlang nangilkil ang usa ka opisyal sa City of Talisay-Traffic Operation Development Authority (CT-TODA) sa usa ka retiradong polis kinsa giingong nakalapas sa balaud sa trapiko niadtong Miyerkules sa buntag.

Base sa blotter sa kapolisan, usa ka Police Chief Insp. Bañares ang mipasangil nga gi-hold siya ni Placido Labajo, enforcer sa CT-TODA, ug gipangayoan og P1,000 aron i-settle ang iyang nahimong kalapasan sa trapiko.

Ang biktima mipasangil usab og robbery sa enforcer tungod kay nabali ang yawi sa iyang sakyanan, base sa blotter.

Si Labajo, planning officer sa CT-TODA, nga nahinabi sa Banat News kagahapon mihimakak sa pasangil.

Matud ni Labajo nga pasado alas 7:00 sa buntag "go" ang traffic light sa "turn left lane" sa may Rabaya junction sa Cansojong habig sa Cebu South Coastal Road apan si Bañares mipahunong kini sa iyang sakyanan hinungdang natanggong ang nagsunod kaniya.

Matud ni Labajo nga wa mopatoo si Bañares sa dihang iyang gisenyasan nga moabante hinungdan nga iyang giduol apan gitubag siya ni Bañares nga di na magsaba kay polis siya.

Matud ni Labajo nga giingnan niya si Bañares nga kung polis man kini makasabot siya sa balaud sa trapiko ug iyang gihangyong tan-awon ang lisensiya niini.

Apan giingong miusab og tubag kaniya ang maong drayber nga "ayaw lagi og saba polis ni, si Bañares…Ako naa koy lisensiya pero dili ko ni ihatag nimo kay TODA ra ka. Kung gusto ka adto ta mag-abot sa LTO."

Si Labajo mipasabot nga dili sila makadakop tungod kay wala silay Temporary Operators Permit (TOP) ug wala usab siya'y citation ticket niadtong higayona .

Human sa maong insidente si Labajo miadto sa Talisay City Police Station aron magpa-blotter apan si Bañares maoy nakauna ug nakugang na lang si Labajo nga gipasanginlan siyang nangilkil.

Nasayran sa Banat News nga ang tibuok pangalan sa nahisgutang polis mao si retired C/Insp. Arceliano Bañares, kanhi hepe sa traffic division sa dakbayan sa Talisay. (BANAT NEWS)