Nagkugos sa iyang anak traysikad drayber gipatay

CEBU, Philippines - Mituasik ang dugo sa traysikad drayber nga gipusil ug gipatay samtang nagsabak sa usa ka tuig niya’ng anak nga nagkamuritsing usab sa dugo sa makapanlimbawot sa balhibo nga krimen didto sa Barangay Pilipog, Cordova kagahapon sa udto. Ang gipatay mao si John Mark Suicemo, 22, nga naila usab sa angga nga Jimboy, 22, ug nagpuyo sa Sitio Pasil, sakop sa Barangay Pilipog.

Matud pa nga ang nagpusil sa biktima mao ang magsoon nga sila si Nerbert  Diama, Marvin Diama, 19, ug Macky Diama, nga mga hingkod na ang panuigon ug nagpuyo usab sa maong dapit.

Si PO2 Vilma Degamo, imbestigador  sa kapolisan sa Cordova, miingon nga naglingkod sa gimaneho nga traysikad ang biktima samtang nagpaabot og pasahero diha nga kalit lang gisakdapan sa managsoon ug gipusil kaduha ka higayon.

Ang bata napiksan sa mituasik nga dugo ug naghilak sa hilabihan nga kahadlok tungod sa lanog nga buto. Wala hinuon maigo ang bata.

Si Marvin Diama nga giingon nga maoy nagpusil makaduha ka higayon ginamit ang kalibre 45 nga pistola dali nga nadakpan didto sa ilang panimalay apan ang duha niya ka igsuon  nakasibat.

Si PO2 Degamo miingon nga adunay nakatug-an nga nahimo’ng uyab ni Macky ang gikapuyo sa biktima nga maoy hinungdan sa ilang panag-away niadtong miaging adlaw. Ang namatay gikataho nga napriso na kaniadto diha nga nadakpan kini sa paggamit og shabu apan nakagawas human makabutang og piyansa.      

Gitanggong na karon sa bilanggoan ang nadakpan nga si Marvin ug ang duha niya ka igsuon gipangita pa sa mga polis. Sa laing bahin, duha ka lalaki ang gipamusil ug usa kanila ang anaa sa kritikal nga kahimtang, didto sa Sitio Ponce 1, Barangay Carreta, dakbayan sa Sugbo.

Ang mga gipusil mao sila si Rodolfo Rodriquez, 47, minyo, walay trabaho ug taga Sitio Cahipa, Hipodromo ug si Miel Jhon Matugas, 23, ulitawo, taga Ayala Access Road, sakop sa Mabolo.

Matud pa ni PO1 Michael Angelo Singson, sakop sa Homicide Section sa Cebu City Police Office (CCPO), nga nagdula og bingo ang duha ka biktima dihang kalit lang kini nga gipamusil sa duha sab ka gunman.

Sumala pa nga nagtaptap sa nawong ang duha ka tawo nga mipusil sa mga biktima ug paspas kaayo nga midagan palayo human sa pagpamusil.  (BANAT NEWS)