Haponesa nalumos samtang nag-dive

CEBU, Philippines - Patay na nga nahidangat sa tambalanan ang usa ka babayeng Japanese human nalumos samtang nagsawom sa kadagatan sa Barangay Maribago, Dakbayan sa Lapu-Lapu alas-10 pasado ang takna niadtong Lunes sa buntag. Si PO1 Jomar Florentino sa Homicide Section sa kapolisan sa maong dakbayan miila sa namatay nga  mao si Yuichie Sugiyama, 54, taga Saitama, Japan ug temporaryong nagpuyo sa usa ka beach resort sa Barangay Maribago sa maong dakbayan.

Si PO1 Florentino miingon nga kauban sa biktima ang diving instructor nga babaye nga usa usab ka Japanese national dihang kini nalumos.

Dugang pa niya nga nag-una sa pag-ambak sa dagat ang biktima gikan sa motor banca ug diretso nga mitidlom.

Dali nga gitabang sa mga kauban ang biktima ug gidala sa usa ka beach resort sa maong dapit ug gihatagan kini og pasiunang pag-atiman sa mga paramedic sa usa ka beach resort sa maong lugar ug pagkahuman  gihatod kini sa Mactan Doctors Hospital apan gideklarar sa mga doktor nga dead on arrival.

Si Florentino miingon nga kasamtangan karong gipahiluna sa usa ka punerarya ang patay’ng lawas sa biktima ug ilang gisugyot nga ipa-autopsy kini aron pagsuta kun may foul play ba o wala  ang kamatayon niini. – /EIM (BANAT NEWS)