Misuway’g panglugos nadakpan

CEBU, Philippines - Usa ka maintenance worker sa usa ka security agency nga dunay opisina sa Barangay Tejero, Cebu City gidakop human gipasanginlang misuway og lugos sa usa ka 37-anyos nga silingan ug nanion pa gyud og armas ngadto sa mga tawong miresponde tungod sa pagpangayo og tabang sa biktima.

Ang nadakpan giila nga si Isagani Alotlot Dulce, maintenance personnel sa GDS Security Agency nga nahimutang ra ‘sab sa maong lugar.

Sumala pa ni Senior Inspector Wayne Magbanua, hepe sa Waterfront Police Station nga nahinabi sa Banat News nga ang babaye nakamatikod nga misulod sa iyang lawak ang suspek ug diretsong mihubo sa gisuot sa babaye.

Apan milugnot kini ug nakiglayog hinungdan nga nakabuhi ug midagan apan gikatahong gigukod kini sa suspek ug dihang naabtan gibukbok niini ang ulo sa babaye, bisan pa man  niini nakaipsot ang biktima ug nakapangayo og tabang.

Diha-diha gisuwayan pagsikop ang suspek apan misukol kini og sinukmagay, ug tungod sa kadaghan sa mga nagtabang kaniya midagan kini ug misud sa gitrabahoang security agency ug mikuha og  kalibre .45 pistola ug gipangtionan ang mga estambay.

Naatlan nga nangabot usab ang mga barangay tanod kinsa daling midakop kaniya. Apan kagahapon sa buntag, ang babaye miadto sa presinto ug mipahibalo nga di na kini interesadong mopasaka og kaso.

Samtang nakapakita og lisensya sa armas ang tag-iya sa gidala nga armas sa suspek apan ipadayon gihapon sa mga polis ang kasong illegal possession of firearms kaniya ug posibleng kasong administratiba alang sa revocation sa lisensya sa armas ang isang-at batok sa tag-iya.  – /EIM  (BANAT NEWS)