Clamping sa mag-ilegal parking padayon

CEBU, Philippines - Nakatilaw og leksyon ang tag-iya sa bag-ong sakyanan nga sagad anha ra pabuntagi pag-parking sa karsada kay naagian kini sa mga sakop sa CITOM clamping team kagahapon sa kaadlawon duol sa gate sa “PC Hills Compound” sa Sitio Maracas, Lahug.

Abi man kaha nila og naundang na ang kampanya sa mga sakyanan nga anha ra ipang-parking sa karsada mao nga mibalik na usab sila sa pag-abuso.

Ang mao nga dapit kanunay nga parkingan og sakyanan bisan dilikado kay likoanan man kana diha.

Ang mga tag-iya niining mao nga mga sakyanan wala makakita nga ang dapit nga ilang giparkingan adunay traffic sign nga “No Parking Anytime” nga sa ato pa, bisan gabii o kaadlawon wala gihapon itugot ang pag-parking.

Usahay, ang mag-parking karaan nga Jiffy, usahay awto nga itom, ug usahay ang pula nga KIA nga maoy nasakpan sa CITOM kagahapon sa kaadlawon.

Matud ni Joy Tumulak, operations chief sa CITOM, nga wala nila undangi ang paghimo’g kampanya aron i-clamp ang mga sakyanan nga ilang masakpan nga anha i-parking daplin sa karsada gikan sa gabii ngadto na sa buntag.

Bisan gani sa adlaw, i-clamp gihapon ang mga sakyanan kun kini makita nga nakabalda sa pag-agi sa mga motorista ug makamugna og problema sa trapiko.

Daghang van-for-hire sa Bohol kolorum

Gitataw ni LTO Acting Regional Director Arnel Tancinco nga pangdakpon gayud ang mga drayber og kolorum nga van-for-hires diha sa Bohol bisan pa og mihangyo si Gobernador Edgar Chato.

Matud ni Tancinco nga pahimoan niya og operation ang mao nga mga kolorum nga sakyanan nga sagad sakyan sa mga turista nga langyaw ug mga lokal nga turista. Sagad sa mao nga mga sakyanan gipanag-iya sa mga adunahan nga gipadagan lang sa pakyaw-pakyaw nga kasabotan kun adunay turista nga moabang aron gamiton pagsuroy sa mga tourist spots.

Ang gobernador sa Bohol gikataho nga mihangyo unta sa LTO nga iangan-angan ang paghimo og pagpanakop mentras ang mao nga mga operators sa kolorum van-for-hires molukat pa og permit sa ilang negosyo.

Base sa Joint Administrative Order 2014-01 ang tag-iya og mga kolorum nga bus multahan og P1 million, P200 mil sa mga van-for-hires ug trak de karga, P120 mil sa taxi, ug P50 mil sa kolorum nga jeepney.

Dinhi sa rehiyon, tulo pa lang ka bus ang ilang nasakpan nga gituohan nga kolorum – duha nasakpan dinhi sa Sugbo ug ang usa didto sa Bohol.

Ngano nga walay pagpanakop sa national highways?

Ang katungdanan sa PNP Highway Patrol Group (HPG)-7 dili kay dinhi lang sa dakbayan ug kinahanglan usab sila nga magpatrolya sa mga national highway, ilabi na sa kalungsoran.

Kay wala may manakop sa mga drayber nga dili motuman sa lagda sa tukma nga pagmaneho og sakyanan, mao kini ang rason nga sa probinsya makita nga pun-on pag-ayo, magsinabakay na gani ang mga pasahero, ang uban adto na sa atop manungtong sa ilang pagsakay.

Daghan sa mga nagpuyo sa kalungsoran ang nangindahay nga unta ang mga sakop sa Land Transportation Office (LTO) ug HPG mohimo unta og pagpanakop sa mga drayber diha sa mga national highways.

Ang insurance sa mga public utility vehicles dili gayud mobayad sa subra nga gidaghanon sa mga pasahero nga mamatay o kaha mangaangol atol sa aksidente mao nga gidili kini sa balaod.