16-anyos nagkinamot gikulata sa kapuyo

CEBU, Philippines - Tungod kay wala mogamit og kutsara atol sa panihapon, usa ka 16-anyos ang nabun-og sa santako sa komo sa iyang kapuyo.

Ang suspetsado nailhan nga si Carlito Cabaluna, 19, taga Cabancalan II, Bulacao, dakbayan sa Sugbo.

Giingong nagkalalis ang duha nga miresulta sa pagsukmag tungod kay nasuko si Cabaluna nga wala magkutsara ang iyang kapuyo.

Midangop ang menor de edad nga biktima sa kapolisan hinungdan nga gisikop ang suspetsado kinsa nakuhaan og lima ka linikit nga marijuana ug usa ka .40 kalibre nga revolver.

Gipaubos sa ballistic examination ang armas sa dinakpan aron pagsuta kung wala ba kini nagamit sa uban pa nga krimen.

Gitanggong sa Pardo Police Station si Cabaluna samtang ang kapuyo nagduha-duha pa kung mopasaka og kaso sa pagpangulata.  (BANAT NEWS)