Tungod sa sigarilyo maguwang gitigbas
CEBU, Philippines - Maayong pagkalangkat sa bukton sa usa ka maguwang human giunay pagtigbas sa iyang manghod sa Sitio Tinago, Barangay Ibo, dakbayan sa Toledo.
Ang biktima mao si Lemuel Dolino, 30, nga nakaangkon og samad tinigbasan sa iyang bukton human gitigbas sa iyang manghod nga si Mark Anthony Dolino, 21, parehong nagpuyo sa maong dapit.
Sa imbestigasyon nila ni PO2 Carlos Barwado ug PO1 Junril Pili sa Toledo City Police Station nga nagkalalis ang manag-igsuon gumikan lang sa sigarilyo nga nisangpot sa ilang away.
Hinungdan nga daling mikuha ang manghod og guna sa walay pagduha-duha gitigbas ang iyang maguwang.
Human sa panghitabo daling misibat ang suspek samtang gidala sa tambalanan ang biktima tungod sa nahiaguman niini nga samad. Hangtod karon padayon pang gipangita ang suspek ug padayong giimbestigahan sa kapulisan ang maong panghitabo. (BANAT NEWS)
- Latest
